الجنة

عن أبي هريرة رضي الله عنه قال: قال رسول الله- صلى الله عليه وسلم-: قال الله تعالى: أعددت لعبادي الصالحين ما لا عين رأت ولا أذن سمعت ولا خطر على قلب بشر.

من زمان وانا فاكر ان الجنة عباره عن جنينه مليانه فاكهه وبيوت وناس راحه جايه وخلاص، بس كنت بسأل نفسي دايما سؤال معوق شوية وهو:

"يعني انا فـ الآخر هروح مكان فـيه فاكهه وآكل بس، طب فين البلايستيشن والكورة والنت والحاجات الي بتشغلنا وبنستمتع بيها ف الدنيا؟!"

بس انا وقتها كنت طفل عنده عشر سنين تقريبا وكان همي كله اني لما اروح البيت الاقي الالعاب و البلايستيشن والحاجات دي اللي كانت بالنسبالي ساعتها اجمل مافي الوجود.!

بس لما عقلي بدأ ينضج شوية بصيت للجنة من نظره مختلفه تماما عن نظرتي وانا صغير؛ وقولت لنفسي مستحيل الجنة الي ربنا وعدنا بيها تبقي عباره عن كده بس! مستحيل تبقي عباره عن مكان للعب البلايستيشن والآكل فقط ! بس لما قرأت الحديث القدسي لاول مره نظرتي اتغيرت اكتر واكتر!
قعدت افكر واقول:

"مالا عين رأت ولا اذن سمعت ولا خطر علي قلب بشر!"

قعدت ارددها كتير اوي، وادركت ان الجنة مش هتضم اهل العصر الحالي من المؤمنين بس؛ لا دي هتضم ناس كتير من بداية خلق نبي الله آدم من اكتر من ٣٠ الف سنة لحد قيام ساعة! يعني احنا بنتكلم عن مراحل زمنية مختلفه تماماً، بنتكلم علي ناس مشافوش البلايستيشن ولا عمرهم اتخيلوا حاجه اسمها كده اساسا وحياتهم كانت غير حياتنا وكل حاجه تقريبا مختلفه عن الزمن الي احنا فيه، يعني مليارات من المخلوقات معاشتش الفترة دي ولا يعرفوا حاجه اسمها نت اصلا!
بس تخيل بجد كده ربنا وهو بيراضي مليارات البشر اللي كل واحد فيهم عنده افكار مختلفه، كل واحد فيهم عاش ف بيئة مختلفه، تخيل كده ربنا وهو بيراضيهم كلهم في مكان واحد! فـ اكيد يعني الجنة عباره عن حاجه اعظم من اعظم حاجه ممكن لعقلنا انه يفكر فيها او يستوعبها حتي!

قال تعالي :

( فَلَا تَعْلَمُ نَفْسٌ مَا أُخْفِيَ لَهُمْ مِنْ قُرَّةِ أَعْيُنٍ جَزَاءً بِمَا كَانُوا يَعْمَلُونَ )

ومن فضل الله علينا ان محدش داخل الجنة غير برحمته سبحانه وتعالى، قال النبي:

«"لَنْ يُدْخِلَ أَحَدًا عَمَلُهُ الْجَنَّةَ". قَالُوا: وَلَا أَنْتَ يَا رَسُولَ اللَّهِ؟ قَالَ: "لَا، وَلَا أَنَا إِلَّا أَنْ يَتَغَمَّدَنِي اللَّهُ بِفَضْلٍ وَرَحْمَة»

فـ ياريت كل واحد مننا يقعد للحظة واحده كده ويرجع لربنا ويحاول ميقصرش فـ حقه سبحانه وتعالي ويفكر فـ الجنة ونعيمها وحلاوتها ورسولها، انا عارف اني اكتر انسان مقصر، بس عارف ان ربنا غفور ورحيم ..